• Home
• سيرة ذاتية

كيما حكيت في البوست الي فات على عصبة الانصار توا باش نحكي على فصيل آخر من فصائل الصراع الي ما خلاش لا اخضر ولا يابس ..
جماعة الكومنفورم في تحالف مع دينصورات المشعارف او اللاأدريين و الي بالمناسبة نسبتهم بالمقارنة بالسواد الأعظم للتوانسة ضئيلة جدااا وهالجماعة ميختلفوش برشا على عصبة الانصار , الواحد قرا كلمتين وجا يحب يعمل فرمتاج لعقول العباد ويعاول يعمل انستال من اول وجديد افكارو الي اكثرها منافية لحريّة التعبير الي يغنيوا بيها , انت متمنش بربي ولا بمحمد عليه الصلاة والسلام فاش قام تسب فيهم ؟ باهي ماو كي انت تسبهم انت قاعد تتعدى على مشاعر الاغلبية الساحقة الي في تونس والي تمن بمحمد وبربي ؟

انا اغلب اليتدوينات الي قريتها للجماعة هذوما كلها هزان و نفضان وسبان يوري المستوى الفكري للجماعة هاذي والي كيما قلت متختلفش برشا على جماعة بوكشطة , هالجماعة ردولنا البلوج سفار بردال وحك راسك وايجا سب …
راهو خواطرنا لعبت والحكاية مساطت فكوا علينا وامشيو انشروا غسيلكم في بلاصة اخرى , اوينو عندكم منتديات الحوار العربية امشيو حاربوا جاهدوا وسبوا والعنوا ومتخافوش اوينوا جماعة بوكشطلة موجودين برشا غاديكا وشيخوا رواحكم غيير فكونا من بلاكم.

توا الواحد ينجم يتنفس الصعداء بعد ما تم الّرفع الجزئي لحضر التجول في البلوجسفر –BlogZéro- وركح شوي الضرب فوق وتحت الحزام وشدّ كل وفصيل مسلّح الركنة متاعو لإحصاء الأضرار و الاستعداد لجولات قادمة من الصراع او صدّ أي هجوم مضاد من الطرف المعادي.
استعمل في الصراع الاخير كل انواع الاسلحة التقليدية والثقيلة ,المحرّمة والغير محرّمة من سب, شتم, قذف, تكفير,كفر-سبّ الجلالة- اخراج من الملّة,تخوين,تحقير…
جماعة الانصار-الله اعلم انصار شكون- عاملين فيها فرسان المعبد فويل لكل آثم مفتر زنيم الحجر لمن كفر-مش بالضرورة كافر بربي يكفي انو يكفر بالافكار الي هم معتنقينها- والعصا لمن عصا والسيف على كل مخالف لقناعاتهم , قالك في هالضروف الي تمر بيها تونس أعلنوا قيام حماس –حركة المقاومة الاسلامة- الافتراضية , وبما انو في تونس كلنا مسلمين سنّة مالكيين ,معندناش ولا علاقة بايران ولا بسوريا اوينو بش ما يقولوش مقاومة للمد الصفوي والتشيع ,اسرائيل بعيدة علينا يعني مش مقاومة لاسرائيل ,فرنسا خرجت من هاك العام وعندنا استقلالنا العسكري لينا اكثر من نص قرن … باهي مقاومة لشكون مالا ؟ اذا فهمتوا حاجة بالله نورونا…
اما واضح جليّا اثر فضائيات البترو-دولار-دين وجماعة بوكشطة الي عايشين في العصور الوسطى الي قاعدين يختاروا منو كان التخلف والظلامية ويبرمجوا في عقول شبابنا بافكار سوداء …
شي يبهّت ويخليني انا كتونسي نخاف بالمنجد على مصيرنا كبلاد و على مستقبلنا السياسي ,لوكان هالعقول وهالمصايب نهار من النهارات يشدوا الحكم منصوّرش تونس شيصير فيها ,ربي يستر.

في الفترة الأخيرة ومنعرش اذا صحيح او لا لكن سمعت انو فما معارضة في تونس أييي نعم ونزيدك زيادة قالو قاعدة تهبط في بيانات و تبرز في مواقف من بعض الاشعاعات المغرضة الي قاعدة تتناول فيها بعض وسائل الاعلام المشبوهة… هالمهارضة قالك تستنكر وتشجب وتحتج وتدين أعمال العنف و أحداث الشغب الي قالت الجزيرة انو قاعدة تصير في تونس .
أوّل حاجة راهو مش صحيح ما عندناش معارضة في تونس يا ولدي شبيك انت ؟؟ انا معارضة وانا تخلويض احنا كلنا لحمة واحدة او شحمة واحدة كلنا متكاتفين كلنا اليد في اليد بش نبنيو تونس الغد او بعد غد اما معارضة واما كلام فارغ , راو توا وقت متاع توحّد ونبذ التفرقة تي احنا عشرة كعبات فاش قام نعملو لرواحنا في المشاكل ودزني وندزّك وتصفيق وتبندير وتطبيل وتمقيص وهذا يسب في هذا وهذا يعري في هاذا وهذاكا يكشف في عار هذايا فاش قام يا خويا !!! فك عليكم من ها تعدّدية متاع وذني ومنعرش شنيا كلام فارغ , تي شوفوا بالله كوريا الشمالية الي انا كي نبدى نتفرج عليهم في التلفزة كيفاش بيداو الكل كي المسطرة بالحرام –مع اني مازلت عازب اما مش مشكلة اتا نحرّم صاحبتي ومعاش نقربها الا بعد ما نجيب قاجو بيرا لخويا آدم ولا كعبتين فودكا لخونا تراب بوي اوينو صدقة خالصة لله – نرجو توا لجماعة كوريا عاد قلتلكم نبدى عامل كيف ومنبهر في هالنضام وهالاستقامة تشوفهم يعملوا في استعراض الكل يخزروا لبلاصة واحدة حركة زاية لا , احنا زادا شناقصنا ؟ .. الكلنا على فرد كلمة –يا اتصلات تونس يا سراق – كيما قال الراجل كلنا متحدين غير انتوما بعدوا علينا الاشعاعات المغرضة والي تنال من وحدتنا وانسجامنا راهو حكاية المعارضة والاحزاب مفماش منها..
هذا بالنسبة لاشاعة وجود معارضة توا نجيو للبيانات المزعومة الي قاعدين يخرجو فيها والي تقول انو فما شغب ومنعرش ندرا شنيا .. راهو كلو كذب وبالامارة انا ديما نتابع في تلفزة مدينة تونس وضواحيها راهو قالوا مفاش منها الحكاية دونك الحكاية كلها كذب في كذب وهاك وسائل الاعلام الاجنبية الي تحقد علينا وغايرة منا قاعدة تهبط في اشعاعات يحبو يشوهوا صورتنا ,شنيا عداو مقطع ولا اثنين متاع شرطة تقتحم في بيوت !! تي انا اتوا نعمل زادا مقطع بادوب برميير -Adobe premiere- ونعملو مكساج ودوبلاج و شوي مؤثرات اتوا نعمل ما احسن من ها المقطع .. بالله يزينا حتى انتم راهو ها الاساليب و هالطرق قديمة برشا ومعادش تجد على المواطن الي شالق بيها ويعرف بالمسبق انو محطات كيما الجزيرة تحقد علينا ومتحبلناش الخير, و وكالت الانباء الفرنسية الي بالمناسبة الفرنسيس عندهم احلام قديمة يحبوا يرجعوا يحتلونا ونزيدك زيادة غايرين منا كيفاش احنا لاباس علينا, فشنيا يعملوا شنيا يعملوا قاموا يخرجوا علينا في الاشعاعات هكّا حقد وغل من مكاسبنا وتونسنا الغالية…
توا نجي للاحداث الي يحكيوا عليها منعرش وين قاعدين يشوفوا فيها ؟؟؟ تي اهبطوا وسط البلاد الناس الكل شايخة امشي للشيلينق-الي ميعرفوش هو مقهى حانة في آخر شارع محمد الخامس من جيهة ساحة باستير- اتوا تلقاه الله مصلي عالنبي مليان الناس كل تبلع امورها هانية امشي لكارفور اتوا تلقا الناس الكل معبيا شاريهوات اشي مقرونة اشي ياغرت اشي غلّة اشي بيرة اشي لحم اشي لبسة اشي كوكا زيرو الناس الكل عايشة وامورها مريقلة وشي ما ناقصها تي بالله اخرج في الروتيكس اتوا تلقى كراهب على كل لون يا كريمة اشي كايان اشي بي ام اشي توارق تي بالله قريب تبدا لكل مواطن كرهبة تي بالحرام الكراهب ولات اكثر من الطرقات عندنا !!! راو امورنا هانية امورنا منظمة امورنا عاال العال رانا قوييييين قويييين قوييييين غير فكونا بركا.